Kthehet ‘vrasësi’

Pasi që duroi dhjetë ndeshje suspendim, Luis Suarez, është i tejemocionuar për rikthimin e tij në fushat e gjelbëra.  

Kështu ka bërë të ditur vetë trajneri i Liverpoolit, Brendan Rodgers, që ka treguar se e ka pasur mjaft vështirë ta koordinojë ofanzivën e ekipit pa uruguajanin. 

“Do të shihni Suarezin posa të hyjë në fushë. Ai është duke u përgatitur maksimalisht dhe po shihet se është në formë të jashtëzakonshme,” u ka thënë Rodgers reporterëve mbrëmë. 

Uellsiani në krye të Liverpoolit nuk ka konfirmuar nëse Suarez do të jetë në 11-shen e parë të Liverpoolit, mirëpo mediat angleze presin që të fillojë me dyshen Daniel Sturridge-Luis Suarez. 

Liverpool do të udhëtojë në Old Trafford të Manchesterit për t’u përballë me Manchester Unitedin në kuadër të League Cup. 

Liverpool pat mposhtur së fundi Manchester Unitedin kampion në Anfield Road në kuadër të Premier League me anë të golit të vetëm të sulmuesit në formë, Daniel Sturridge.

Luis Suarez u suspendua nga Federata angleze e futbollit pasi që kishte kafshuar mbrojtësin serb të Chelseat, Branislav Ivanovic, gjatë ndeshjes në stinorin e kaluar.