Liria pa gol! Rahoveci mposht prizrenasit

Pa asnjë gol të shënuar në miqësore, Liria është mposhtur edhe nga Rahoveci në përballjen e djeshme të zhvilluar në Përparim Thaqi të Prizrenit.

Futbollistët e Rahovecit, të ardhur rishtaz nga Liga e Dytë e Kosovës kanë shënuar fitore me rezultat 2-0.

Liria shterpe në anën tjetër, deri vonë edhe pa trajner, ka luajtur futboll sa për të thënë, ndërsa Rahoveci me golin e epërsisë së Donat Krasniqit e më pas me të Haxhi Sadës ka kryer provën e Prizrenit me sukses.

Derisa Liria ende nuk ka të qartë alternativat për stinorin e ri që është në derë, Rahoveci po vazhdon me rezultate të mira në përgatitje, ndërsa me përforcimet e bëra në skuadër dhe mbështetjen që ka marrë pritet të mos jetë pre e lehtë për kundërshtarët në Ligën e Parë A të Kosovës.

Ditë më parë Rahoveci mposhti Ramiz Sadikun 4-2, pastaj Dukagjinin e Klinës 2-1 ndërsa u mposht nga Malisheva 1-0.