Lufta me natyrën

Kombëtaret e kualifikuara në Kampionatin Botëror në “Brazil 2014” do të kenë një luftë të tipit “Survivor” përveç luftës me kundërshtarët në fushë. 

FIFA ka vendosur që kombëtaret të lëvizin nga vendet me temperatura tropikale në ato me mesatare për një ndeshje të grupit. Por ato do të kenë një mundim tjetër përveç ndërrimit drastik të klimës. 

Brazili zë vendin e pestë të shteteve me hapësira më të madhe në Botë. 

Shembulli konkret është ky. Kombëtarja që do të luaj kundër Brazilit në ndeshjen e parë të Kampionatit Botëror (ekipi që do të tërhiqet në short si A2) do të duhet të fluturojë 3880 kilometra për në Manaus të Amazonisë për ndeshjen e dytë, derisa ndeshjen e tretë do të duhet ta zhvillojë në Recife, për ku duhet t’i bëjë 4508 kilometra tjera. 

E një skuadër me stafin e saj komplet që i mbijeton të gjitha këto mundime, pa llogaritur lëndimet që do të mund të ndodhin në ndeshje, me siguri do ta meritonte një vend në fazën eliminatore, pra daljen nga grupi - vetëm e vetëm për stoicizmin e treguar. 

Përveç kësaj, edhe ora e nisjes së ndeshjeve do të jetë problem në vete. Ato shumë do të varen se a luhen në veriun me lagështi apo në jugun e freskët. 

Sipas orës braziliane, ndeshjet do të luhen në ora 13:00, 16:00 dhe 19:00, për t’iu përshtatur orarit europian që i bie 18:00, 21:00 dhe 24:00. 

E në verilindje të Brazilit temperaturat mund të vlojnë në atë kohë! 

Kryetari i FIFA-së, Sepp Blatter, ka thënë se FIFA për momentin nuk ka ndërmend të ndërrojë diçka nga këto orare, por do të shikojë mundësitë tjera. 

Të premten pasdite me orën e Europës Qendrore, do të hidhet shorti i grupeve të Kampionatit Botëror Brazili 2014, i cili do të transmetohet drejtpërdrejtë në 193 shtete botërore.