Fitore në Olimpico pas 5 vitesh

Në njërën anë shqiptarë të kombëtares së Shqipërisë, në anën tjetër shqiptarë të kombëtares së Zvicrës. Lazio priti në Olimpico Napolin në derbin e sontëm, në ndeshjen tjetër të Serie A-së sonte që përfundoi me goleadë. 

Fitues dolën shqiptarët e kombëtares zvicerane, ku Valon Behrami luajti për 90 minuta dhe shënoi një autogol kur u devijua shuti i Antonio Candrevas nga ai për në portën e Pepe Reinas, derisa Blerim Dzemaili u fut në lojë në 15 minutëshin e fundit, për të mbrojtur rezultatin e ekipit të Rafael Benitezit. 

E te Lazio, vetëm Lorik Cana ishte në fushë për 90 minuta, derisa portieri Etrit Berisha qëndroi në bankën rezervë gjatë gjithë ndeshjes.  

Napoli Udhëhoqi me golin e Gonzalo Higuainit, derisa menjëherë lacialët barazuan pas autogolit të Behramit, për të shkuar në pushim 15 minutësh me barazim 1-1. 

Napoli pjesën e dytë ia nisi më mirë, ku sulmuesit Goran Pandev dhe Gonzalo Higuain shënuan për epërsi 1-3, derisa Balde Keita i Lazios dha shpresa për ekipin e Vladimir Petkovicit kur në minutën e 88 minimizoi epërsinë napolitane. 

Por, në fund ish anëtari i Real Madridit, Jose Maria Callejon u përkujdes për t’i dhënë fund dilemës së fituesit duke shfrytëzuar moskujdesin e mbrojtjes së biancocelestëve për rezultatin përfundimtar 2-4. 

Kjo ishte fitorja e parë e ekipit të Benitezit pas tre humbjeve me radhë, dy në Serie A dhe një në Ligë të Kampionëve. E për Lazion ka qenë humbja e parë në 5 ndeshjet e fundit të tyre në të gjitha garat. 

Napoli ruan vendin e tretë të tabelës së klasifikiimt në elitën italiane, derisa Lazio gjindet në pozitën e nëntë me 17 pikë, sa kanë edhe Milan (8), Parma (10) dhe Atalanta (11). 

Rezultatet dhe tabela aktuale.