Lufta për barazim

Liverpool pas vetëm 36 minutash lojë në Anfield Road, ka parë befasisht veten në disavantazh prej dy golave. 

Ekipi i Paul Lambert, Aston Villa, me një lojë të mirë dhe me sulmuesit që po hynë në formë, ka arritur të shënojë dy herë deri në këtë minutë. 

Austriaku Andreas Weimann dhe belgu Christian Benteke, që po shënon dy herë në dy ndeshjet e fundit kanë qenë ata që i kanë dhënë epërsi prej 2-0 ekipit nga Birminghami. 

Mirëpo, ekipi i Brendan Rodgers, ka ndezur motorët pas kësaj dhe është munduar që të fitojë ndeshjen përkundër se në fund nuk e arriti atë. 

Së pari Daniel Sturridge ka shënuar për të ulur epërsinë në fund të pjesës së parë, derisa në minutën e 53-të Steven Gerrard ka shënuar nga penalltia për të barazuar rezultatin. 

E pastaj ofenziva e kuqe ka vazhduar deri në fund të ndeshjes, mirëpo pa ndërrim në rezultat pasi që Luis Suarezit nuk i shkoi për dore që të bëj diçka më shumë kësaj radhe dhe t’ia nxjerrë fitoren e kërkuar Liverpoolit. 

Kjo ka qenë hera e dytë në këtë stinor që Liverpool nuk merr pikë të plota në Anfield Road, pas 12 ndeshjeve të zhvilluara si vendas. 

Mirëpo, nuk duhet harruar se edhe Aston Villa ka një histori solide në Liverpool, ku ka vetëm një humbje në tre vizitat e fundit aty, mes këtyre edhe fitoren prej 3-1 në dhjetor të vitit 2012. 

Rezultatet dhe tabela aktuale.