Manaj në radar të Partizanit

Skuadra e Partizanit mund të jetë adresa e re e futbollistit të talentuar të Interit, Rei Manaj.

Të kuqtë nga Tirana janë në tentativë për të arritur marrëveshje me gjigantin italian, Interin, për ta huazuar talentin shqiptar, Rei Manaj, gjatë afatit kalimtar të janarit.

Lajmi është konfirmuar edhe nga vetë klubi i Partizanit, i cili me anë të një njoftimi në faqen zyrtare në Facebook, ka dhënë sqarime në lidhje me këtë çështje.

“Politika e klubit dhe presidentit Demi është që të afrojnë në skuadër lojtarë të rinj cilësorë dhe me perspektivë, të cilët të mund të kontribojnë për Partizanin dhe njëkohësisht fanella e kuqe t’iu shërbejë si një trampolinë edhe drejt ekipit kombëtar. Drejtori Dervishi saktëson se ka patur kontakte për të afruar sulmuesin 18 vjeçar përgjatë merkatos së janarit dhe nësë kjo tratativë konkretizohet Manaj do të jetë pjesë e 15-të herë kampionëve të vendit deri në përfundim të sezonit futbollistik 2015 – 2016. Partizani mbetet i hapur për të gjithë lojtarët me perspektivë, të cilët dëshirojnë të kontribuojnë me ekipin më popullor të Shqipërisë. Me hapjen e merkatos së janarit, klubi do të jetë mjaft aktiv në këtë periudhë për të përforcuar skuadrën me element cilësor në mënyrë që të konkuroj deri në javën e fundit për fitimin e titullit kampion. Presidenti Demi do të vazhdojë të kontribuojë, sikurse ka bërë përgjatë gjithë këtyre viteve për ta rikthyer Partizanin tek trofetë,” thuhet në njoftimin e Partizanit.

Manaj këtë stinor ka pasur rastin të paraqitet tre herë me fanellën e Interit në Serie A, duke luajtur gjithsej 26 minuta, mirëpo ky minutazh nuk e kënaq aspak lojtarin i cili synon të jetë pjesë e kombëtares shqiptare në EURO 2016 dhe për këtë arsye është i gatshëm të huazohet në një skuadër tjetër ku mund të ketë më shumë hapësirë për lojë, në mënyrë që ta bind përzgjedhësin e kuqezinjëve, Gianni De Biasin.