Më lehtë me Papën se babain e Januzajt

Gianni De Biasi, trajneri italian i kombëtares shqiptare, gjatë një bisede në kanalin televiziv Albanian Screen ka përdorur një batutë për të treguar vështirësitë e kontaktimit me talentin kosovar të Manchester Unitedit, Adnan Januzaj. 

“Për batutë, dua të them se më lehtë lidhem me Papa Françeskun sesa me Abedin Januzajn (babai i Adnanit, menaxher i futbollistit). Thjesht, nuk kemi pasur asnjë kontakt me djaloshin e talentuar. Unë me drejtuesit e FSHF-së kemi bërë të pamundurën për ta kontaktuar, por problem është babai i tij, i cili nuk kthen qoftë edhe një përgjigje normale,” ka thënë mes tjerash De Biasi kur u pyet nga udhëheqësi i emisionit lidhur me ‘çështjen Januzaj”. 

Talenti 18 vjeçar i Manchester Unitedit, Adnan Januzaj, është bërë ‘përrallë’ nëpër mediat botërore për të kuptuar se për cilën përfaqësuese do të luajë. 

Në ndeshjen e mbrëmshme të Manchester United ndaj Sunderland në Old Trafford, ka qenë i pranishëm edhe trajneri i Belgjikës, Marc Wilmots, i cili po kërkon të bind talentin që të pranojë reprezentacionin belg që do të merr pjesë në KB Brazili 2014. 

Adnan Januzaj ka nisur karrierën e tij futbollistike si junior në Belgjikë, prej nga në moshën e re ka kaluar në Manchester United, duke u bërë sot njëri ndër lojtarët që më së shumti po bind në ekip.