Memushaj: “Kombëtarja nuk duhet të varet nga Abrashi e Xhaka”

Mesfushori i kombëtares shqiptare, Ledian Memushaj, e ka vlerësuar ndeshjen kundër Bosnjës dhe Hercegovinës, nga e cila Shqipëria u nda me humbje me rezultat 1-2.

“Ishte një ndeshje që duhej fituar. Kemi kohë që nuk kemi fituar. Kemi luajtur mirë. Ishim kryesisht në fushën e kundërshtarit. Nuk duhet të pësonim, por pësuam nga gabimet tona. Nuk duhet të bëjmë më gabime të tilla,” tha Memushaj.

Ai më tej foli edhe për dy bashkëlojtarët e tij në mesfushë, Amir Abrashin e Taulant Xhakën, të cilët janë larguar nga kombëtarja para kësaj ndeshjeje.

“Abrashi dhe Xhaka janë dy lojtarë shumë të rëndësishëm për ne dhe gjithashtu janë të rëndësishëm edhe për çdo ekip tjetër ku luajnë. Por kombëtarja nuk duhet të varet vetëm nga ata. Duhet të mendojë si gjithë së bashku, e jo si individë,” përfundoi ai.