Merr ftesë nga Kosova

Mesfushori i Manchester Unitedit, Adnan Januzaj, si duket ka marrë ftesë nga përfaqësuesja e Kosovës për ndeshjen e parë miqësore ndërkombëtare të vendit më 5 mars. 

Kështu ka njoftuar sot e përditshmja The Guardian duke cituar sekretarin e përgjithshëm të FFK-së, Eroll Salihu, që kishte folë për Daily Star. 

“Ne jemi në diskutime me familjen e Adnanit. Nëse do ta kishim atë në ndeshjen e parë të Kosovës, do të ishte një simbolikë e madhe,” ka thënë Salihu. 

“Gjithashtu, ne e dimë se me pjesëmarrje në këtë miqësore nuk do të thotë që ka zgjedhur përfaqësuesen e Kosovës. Kjo ndeshje është miqësore dhe nuk do të ndikojë që ai të luaj për një përfaqësuese tjetër në të ardhmen,” ka përfunduar Salihu. 

I lindur në Bruksel, Januzaj 18 vjeç, ka të drejtë të zgjedh disa përfaqësuese si Kosova, Shqipëria, Belgjika e edhe më larg sikurse Anglia, derisa mediat angleze njoftojnë që trajneri i albionëve, Roy Hodgson, është impresionuar tejet mase me djaloshin me origjinë nga Istogu këtë stinor.