Milan s’është ekip

Disfata 4-1 ndaj Atletico Madridit mbrëmë në ndeshjen e kthimit të Ligës së Kampionëve, që eliminoi krejtësisht rossonerët nga Europa nuk ka kaluar pa kritika për lojën e italianëve. 

Ish trajneri i Milanit, Arrigo Sacchi, që aktualisht punon si analist në Sport Mediaset, ka dhënë kritika të mëdha pas ndeshjes. 

“Ky është moment dëshpërues për futbollin italian dhe për Milanin. Ky thjesht nuk është ekip. Ata nuk mbrohen kolektivisht dhe këto janë kufinjtë e lojës individuale. Në sulm kanë shumë lojtarë vetjak, stili i futbollit nuk ka logjikë për këtë,” ka thënë mes tjerash Sacchi. 

Derisa në anën tjetër ai nuk ka harruar të urojë Diego Simeonen për punën me ekipin e tij. 

“Në anën tjetër, kemi një futboll kolektiv të mirë me një sulmues të jashtëzakonshëm si Diego Costa, që është i mrekullueshëm në lëvizjet pa top,” ka shtuar ish trajneri i rossonerëve në komentet e tij pas ndeshjes në kanalin televiziv në fjalë. 

Milan kishte humbur ndeshjen e parë nga Atletico Madrid në San Siro 0-1 dhe shpresonte në një rikthim të mundshëm në Vicente Calderon të Madridit, por në fund, rossonerët humbën edhe aty 4-1 që në total eliminimi i tyre u bë me rezultat 5-1. 

Atletico Madrid vazhdon garat në Ligë të Kampionëve në TOP 8 më të mirët, derisa Milan si përfaqësues i vetëm italian në elitën e futbollit europian, është përshëndetur nga garat.