Milicaj, lider i golashënuesve

Sulmuesi i Istogut, Mark Milicaj, është golashënuesi më i mirë i Superligës së Kosovës aktualisht. 

Pas 11 xhirove të para, ku të gjitha ekipet janë takuar nga njëherë me njëra-tjetrën, Milicaj, është gjetur në krye të listës së golashënuesve me 8 gola të shënuara për ekipin e Troftave. 

Njeriu që njihet si “Di Maria” i Kosovës për shkak të ngjajshmërisë me yllin argjentinas të Manchester Unitedit, është dalluar posaçërisht në ndeshje ndaj liderit të deridjeshëm Hajvalisë, kur shënoi hat-trick. 

Milicaj ka shënuar gati gjysmën e golave të ekipit të tij që në përgjithësi ka shënuar 17 gola në 11 xhirot e para të Superligës. Deri më tani janë zhvilluar një e treta e ndeshjeve të Superligës dhe lufta për golgeterin përfundimtar më të mirë pritet të jetë tejet interesante, pasi që disa nga sulmuesit e Superligës janë afër kreut të renditjes. 

Pas Milicajt, sipas golave të shënuara, nga gjashtë, renditen dyshja Kastriot Rexha i Besës dhe Kreshnik Lushtaku i Drenicës, derisa me 5 gola të shënuara janë: Semir Zeneli e Genc Hamiti nga Hajvalia, pastaj Blerand Kurtishaj i Trepçës’89 dje Labinot Osmani i Llamkos Kosovës.