DRITA - LIRIA
Mposhtet nga kampioni, bie në tabelë
16 March, 2019 @15:57
Nuk ka filluar mirë cikli i tretë i sezonit për skuadrën e Lirisë.
Skuadra prizrenase u mposht sot me rezultat 2-0 nga Drita, në një takim që u vendos me dy golat e shënuara në 15 minutat e fundit të ndeshjes.
Portat ishin të paprekura deri 11 minuta para përfundimit të kohës së rregullt, moment në të cilin Filonit Shaqiri i vendasve shënoi pas asistimit nga Xhevdet Shabani, për t’ia dhënë golin e epërsisë skuadrës së tij. Katër minuta më vonë, fitorja e kampionit në fuqi të Kosovës u vulos nga Betim Haxhimusa, i cili shënoi për 2-0, rezultatin përfundimtar të ndeshjes.
Humbja e pësuar sot bën që Liria të bie në pozitën e parafundit në tabelë, kjo pasi që Ferizaji arriti të marrë pikë në Drenicë, kurse Drita momentalisht mbetet e qetë në vendin e katërt në tabelë.
Punë aspak e lehtë nuk e pret Lirinë as xhiron tjetër, ku ndeshet me Llapin në Prizren, kurse Drita i shkon Ferizajit.
