Nata e El Clasicos

Barcelona që ka një pikë më shumë se Real Madridi në klasifikim kërkon që të krijojë epërsinë kyqe para fundit të vështirë të stinorit në La Liga. 

Në anën tjetër, Real Madrid e din se ky është rasti i fundit për Los Blancos që të kryesojnë. 

Derisa ekipi katalonas ka marrë epitetin e favoritit te bastoret e huaja, madrilenët janë befasuar me kuotën e dhënë për ‘ta në rast të fitores, 4.75. 

Gjyqtarë do të jenë treshja: Antonio Mateu, Pau Cebrian dhe Jon Nunez. 

El Clasicoja e fundit i takoi Real Madridit që me fitore 3-1 kishte mposhtur Barcelonën në Santiago Bernabeu. Epërsisë së Barcelonës përmes Neymarit, i ishin përgjigjur Cristiano Ronaldo me penallti, pastaj Pepe dhe në fund Karim Benzema. 

Lionel Messi është golashënuesi më i mirë i La Ligas aktalisht këtë stinor me 32 gola të shënuara, ndërsa pas tij vjen Cristiano Ronaldo me 30 gola. 

Pas dyshes në fjalë, i treti në listë është Neymar, që ka 17 gola të regjistruara këtë stinor. 

Sa i përket 5 ndeshjeve të fundit në La Liga, Barcelona ka të regjistruara 4 fitore e një humbje. Ndërsa Real Madridi 3 fitore, 1 barazim dhe 1 humbje. 

Shikuar formën e përgjithshme në të gjitha garat për muajin mars, Blaugranat kanë 4 ndeshje prej të cilave 4 fitore të shënuara, derisa Reali fitoren e parë të këtij muaji e arriti në xhiron e shkuar ndaj Levantes në shtëpi, pas barazimit ndaj Villarealit dhe 2 humbjeve me radhë nga Athletic Bilbao e Schalke brenda 4 ditëve. 

Të gjitha të thënat e deritashme janë vetëm statistika para se futbollistët e dy ekipeve më të famshme në botë të dalin në fushë. Një përkujtim për atë që do të mund të thuhej se është forma aktuale e dy skuadrave para super derbit, së cilës në fund mund t’ia vendos fatin një sekondë moskoncentrimi, shpejtësie apo magjie nga defiluesit në fushë.