COPPA ITALIA
Një Milan që s’dorëzohet, me përmbysje arrin gjysmëfinalen!
28 January, 2020 @23:18
Nga 1-0 në 1-2 e më pas nga 1-2 në 4-2.
Kështu shkoi ndeshja mes Milanit dhe Torinos sonte, ndeshje e vlefshme për fazën çerekfinale të Coppa Italia.
Në ndeshjen që filloi duke e nderuar legjendën Kobe Bryant, një rossoner i flaktë, skuadra rossonere ishte shumë pranë humbjes, me torinezët që kishin epërsi 1-2 deri në çastet e fundit të ndeshjes. E në minutat shtesë të ndeshjes, ishte Calhanoglu (90+1’) ai që e barazoi rezultatin në 2-2, për ta dërguar ndeshjen në vazhdime.
I njëjti lojtar (106’) shënoi për 3-2 edhe gjatë vazhdimeve, para se Zlatan Ibrahimovic të shënonte (109’) për 4-2 dhe ta vuloste kualifikimin e Milanit në gjysmëfinale të Kupës.
Në gjysmëfinale të Kupës Milani do të takohet me Juventusin, që kaloi tutje duke e mposhtur Romën, kurse në gjysmëfinalen tjetër Napoli do të përballet me fituesin e duelit Inter vs. Fiorentina.
Sa për t’u përmendur, Samir Ujkani edhe sonte ishte rezervë e papërdorur te Torino.