LLAPI-VLLAZNIA
Përmbysje për lidership, Llapi shkëlqen në fund
29 October, 2017 @14:44
Llapi është treguar i pamëshirshëm ndaj Vllaznisë së Pozharanit në 20 minutëshin e fundit të takimit sot.
Përkundër se Festim Alidema i dha shpresa ekipit të Bylbyl Sokolit me golin e hershëm në takim dhe mundësit për të shënuar më pas për të ngritur epërsinë, në pjesë të dytë Llapi ka pasur fytyrë krejt tjetër.
Inkuadrimi në lojë i Valon Zeqirit dhe posaçërisht Hamdi Namanit ka bërë të veten. Namani është treguar motor i mesfushës, ndërsa më pas Mentor Zhdrella ka barazuar rezultatin.
Zhdrella 9 minuta para fundit i jep avantazhin Llapit, për të rrënuar krejtësisht shpresat e Vllaznisë, që deri në fund pësoi edhe 2 herë.
Së pari Mirlind Daku shënoi për 3-1, ndërsa krejt në fund Valon Zeqiri vulosi epilogun e takimit, 4-1.
Llapi rimerr lidershipin e Superligës nga Prishtina me këtë fitore, duke dominuar me lojë dhe cilësi në fushë, e Vllaznisë i mbetet të kërkojë tjetërkund pikë.
