Porto e Valencia, fitore të rëndësishme

Kampioni i shumëfishtë i Portugalisë, Porto, ka arritur të mposht Napolin në ndeshjen e parë të së tetës së finales së Europa League. Djelmoshat e trajnerit Luis Castro kanë arritur që të shënojnë golin e vetëm të ndeshjes me anë të sulmuesit më të mirë të tyre, kolumbianit Jackson Martinez. 

Martinez ka shënuar në minutën e 12-të të pjesës së dytë të ndeshjes për të përcaktuar fituesin e ndeshjes së parë, derisa tani napolitanët duhet të kërkojnë çerekfinalen në San Paolo një javë më vonë. Valon Behrami ka qenë në formacion të Napolit që nga fillimi deri në fund të ndeshjes, derisa Blerim Dzemaili nuk është futur fare për ekipin italian në ndeshje nga trajneri, Rafael Benitez. 

Përballja e legjionarëve, me barazim

Në ndeshjet tjera të përfunduara tani, Baseli i vëllezërve Ajeti (ku u paraqitën të dytë, Arlindi dhe Albiani) ka barazuar në shtëpi ndaj Red Bull Salzburgut për të cilin në pesë minutat e fundit të ndeshjes u paraqit reprezentuesi i Norvegjisë, Valon Berisha. 

Ludogoretsi bullgar, që eliminoi Lazion javë më parë, është mposhtur thellë në Sofje nga Valencia 0-3 dhe që tash ka shuar shpresat për kalim tutje, derisa lakuriqët kanë treguar performancë impresive si mysafirë.