Prej Partizanit në AIK të Suedisë

Mesfushori ofanziv, Jasir Asani, është lojtar i ri i ekipit të njohur suedez, AIK Solna.

Mesfushori i Partizanit, do të kalojë te skuadra suedeze në formë të huazimit nga janari 2020, derisa AIK do të ketë të drejtën e blerjes së kartonit të Asanit në fund të sezonës.

Asani 24 vjeç, do të jetë në dispozicion të kampionit të Shqipërisë edhe në ndeshjet e radhës ndaj Teutës dhe Vllaznisë.

Jasir Asani gjatë karrirës së tij te Partizani ka luajtur në 74 ndeshje me 15 gola të shënuara.

Në deklaratën e tij të parë si lojtar i ri i AIK-ut, për web faqen zyrtare të klubit Asani ka thënë se është i lumtur që do të mund t’i shërbejë një ekipi si ky.

“Futbolli është pasion imi, ndërsa mundësia që të jem pjesë e një ekipi si AIK, është nder për mua. Do të bëj gjithçka në mundësitë e mija për të treguar më të mirën për klubin, të fitojë zemrat e tifozëve dhe përkrahjen e bashkëlojtarëve,” ka thënë Asani për faqen zyrtare të klubit suedez.

Në përshkrimin që iu bë Asanit nga faqja e AIK-ut, për të cilën foli menaxheri sportiv i ekipit, Bjorn Wesstrom, thuhet që ai me shpejtësinë e tij në lojë me dhe pa top është shumë i mirë, ndërsa këmba e majtë e tij mund të jetë vrasëse për mbrojtjet kundërshtare.

Në aspektin defanziv, Asani është krejtësisht natyral në mbulimin e pozitave dhe kontribuon shumë. AIK do të kërkojë nga Asani që të rrezikojë kundërshtarin nga çdo kënd i mesit të fushës, ndërsa ekipi mezi pret që ta ketë atë në dispozicion në fushë prej janarit 2020.

Përndryshe, Asani 24 vjeç është i lindur në Shkup të Maqedonisë Veriore dhe karrierën e pat nisur në Vardar, prej ku kishte kaluar te Shkupi e pastaj edhe Pobeda, para se të bëhet anëtar i Partizanit të Tiranës - me të cilët fitoi titullin e kampionit të Shqipërisë - një trofe, që i mungonte me dekada demave të Tiranës.