CHE-PSG

REUTERS

Punë për të rinjtë

8 April, 2014 @10:06

Disfata 3-1 në Paris në ndeshjen e parë e ka lënë të befasuar trajnerin portugez të Chelseat, Jose Mourinho. Ai nuk kishte besuar te goli i shënuar nga Javier Pastore, që kishte kaluar katër lojtarë të tij dhe kishte shënuar në minutat shtesë për 3-1.

Barra te lojtarët

“Ishte shaka, nuk ishte gol. Ishte shaka,” kishte thënë Mourinho pas ndeshjes së humbur, javën e kaluar.

E sa i përket ndeshjes së kthimit ai ka një bindje krejt tjetër. Nuk kërkon gjysmëfinalen e Ligës së Kampionëve, nëse këtë nuk e meritojnë vetë lojtarët - prandaj, përgjegjësia është te ata.

“T’ju them se dy finalet e fituara nga unë dhe ekipet e mija, janë netët më të rëndësishme të futbollit për mua. Nëse Parisi eliminohet sonte, do të jetë një dëshpërim i madh për ata; Nëse ne eliminohemi, është diçka që njerëzit e presin. Me buzëqeshje duhet hyrë në lojë, për t’ia dhënë besimin edhe tifozëve tanë se mundemi, këtë lojtarët duhet t’ia transmetojnë atyre,” ka thënë Mou në deklaratat e tij para ndeshjes së sotme që luhet në Stamford Bridge të Londrës.

Kundërsulmi, zgjidhje

Në anën tjetër, parisienët e udhëhequr nga Laurent Blanc do të duhet të kryejnë punë pa sulmuesin e tyre më të mirë, Zlatan Ibrahimovic.

“Me shpirt dhe me motivim duhet të kërkojmë kualifikimin. Se si do të shkojë ndeshja, nuk e dimë, kjo është e bukura e futbollit. I kemi bërë probleme Chelseat sepse luanin më thellë në mbrojtje, por edhe nëse dalin sonte në sulm, do të krijojnë hapësirë për Ezequiel Lavezzin,” ka thënë Blanc para ndeshjes.

Edhe rezultati i sontëm është tejet i kalkulueshëm. Me 2-0 Chelsea shkon përpara, me 3-1 luhen vazhdimet, derisa me 4-2, kualifikohet Paris St Germain - nëse del ndonjëri nga ky rezultat.

Përkundër se parisienët kanë avantazh të theksuar, çdo gjë mbetet të vendoset në 90 minutat interesante të Stamford Bridge sonte.