DER KLASIKKER
Qartësohen me 25 maj
4 May, 2013 @21:48
Dy super ekipet gjermane, Borussia Dortmund dhe Bayern Munchen, kanë luajtur ndeshjen e xhiros së XXXII të Bundesligës - baraz.
Finalistët e Ligës së Kampionëve që lanë pa tekst super ekipet spanjolle, Real Madridin dhe Barcelonën kanë pasur sot një paraqitje tejet të matur dhe kanë pushuar disa nga lojtarët kyq të skuadrave.
Milionerët kaluan në epërsi në minutën e 11-të të ndeshjes kur Kevin Grosskreutz shënoi, ndërsa po aq minuta më vonë Mario Gomez barazoi dhe kjo ishte e tëra nga ndeshja, sa i përket rezultatit.
Kush nuk luajti?
Mario Götze nuk luajti fare, Marco Reus hyri në 20 minutat e fundit dhe Sven Bender u fut në lojë vetëm pesë minuta. Ilkay Gundogan përkundër se ia nisi ndeshjes, u zëvendësua pas vetëm 15 minutave lojë. E, Matts Hummels qëndroi gjatë tërë ndeshjes në bankën rezervë.
Te bavarezët, në sulm sot luajtën dyshja rezervë, Mario Gomez dhe Claudio Pizzaro. Krahët, Franck Ribery dhe Arjen Robben nuk ishin fare aty. Xherdan Shaqiri ishte solid në 90 minutat e tij. Javi Martinez shikoi tërë ndeshjen nga banka rezervë.
Penalltia dhe kartoni i kuq
E sulmuesi më i mirë i Dortmundit, që po kërkohet nga klubet e mëdha si Bayern, Chelsea dhe Manchester United, Robert Lewandowski huqi penalltinë në minutën e 60-të që do të mund t’ia sillte fitoren milionerëve.
Në anën tjetër, krahu brazilian i bavarezëve, Rafinha, për dy minuta morri dy kartonë të verdhë dhe u përjashtua nga ndeshja duke e lënë Bayernin me dhjetë veta në fushë që nga minuta e 64-të.
Bayern është shpallur kampion në Gjermani javë më parë, kurse Borussia Dortmund gati ka siguruar vendin e dytë.
Këto dy ekipe do të takohen me 25 maj në Wembley të Londrës për të përcaktuar kampionin e ri europian.
Tabela dhe reultatet në Bundesligë sot.
BUNDESLIGA, SOT:
Borussia Dortmund - Bayern Munchen | 1-1 | Grosskreutz 11' - Gomez 22' |