Shpëtimtari Muriqi, Kosova s’dorëzohet dhe merr pikën

Pas triumfit në Batumi të Gjeorgjisë, Kosova sonte barazoi 1-1 ndaj Greqisë në “Fadil Vokrri”.

Në ndeshjen e luajtur në një “Fadil Vokrri” me rreth 1200 të pranishëm, Kosova ishte shumë pranë humbjes, por në kohën shtesë të ndeshjes ishte Vedat Muriqi ai që shënoi me kokë, për ta evituar kështu humbjen e skuadrës.

Pjesa e parë e ndeshjes ishte kryesisht e qetë. Kontrollin e ndeshjes e kishte kryesisht Kosova, por raste serioze për shënim nuk pati asnjëra skuadër, deri shumë pranë fundit të pjesës së parë.

Në rastin e parë të krijuar, Greqia e gjeti golin e epërsisë. I vetëm përballë Muriqit, Douvikas i Greqisë shënoi për 0-1 në minutën e 45+2’ e kështu mysafirët shkuan në pushim me epërsi minimale.

GRUPET KUALIFIKUESE

Me të filluar pjesa e dytë, Challandes bëri ndryshime në fazën ofansive, duke e inkuadruar Zymer Bytyqin në vend të Lirim Kastratit. e më vonë u bënë edhe disa zëvendësime tjera me qëllim gjetjen e golit të barazimit.

Ndonëse kualiteti i lojës së Kosovës nuk u përmirësua shumë, goli i barazimit erdhi. Në goditjen e parë në portën kundërshtare, Kosova shënoi. Pas një topi të krosuar nga Zymer Bytyqi prej anës së majtë, Hadërgjonaj me kokë asistoi për Vedat Muriqin, e ky i fundit arriti ta çojë topin në rrjetën kundërshtare (90+2’). Kështu, ndeshja në fund u mbyll me rezultatin përfundimtar 1-1.

Për shkak të kartonëve të verdhë që i morën sonte, Lirim Kastrati dhe Besar Halimi do të mungojnë në ndeshjen e ardhshme të Kosovës. Kur jemi te kartonët e verdhë, në minutën e 73’ të ndeshjes edhe Bernard Challandes u ndëshkua me të verdhë pas ankesave të vazhdueshme ndaj gjyqtarëve.

Përveç dy mungesave të lartpërmendura, në ndeshjen ndaj Spanjës Kosova mund të jetë edhe pa Valon Berishën, i cili sonte u largua nga loja për shkak të një lëndimi.

Tashmë Kosova ka 4 pikë në Grupin B pas 4 ndeshjeve, duke u renditur në vendin e tretë të grupit momentalisht.

Pas tri ditëve, Kosova luan ndaj Spanjës në Prishtinë, kurse Greqia e pret Suedinë.