Shqipja fluturon lartë

Ndodhi ashtu siç pritej, Shqipëria në TOP 50.

Kombëtarja kuqezi ka treguar një ngritje të madhe në renditjen botërore të FIFA-s duke u ngjitur në pozitën 45 nga pozita 70 që e kishte më parë.

Ngritja prej 25 pozitave erdhi pas fitores historike si mysafire të Shqipërisë ndaj Portugalisë, e kjo e fundit megjithatë vazhdon ta mbajë pozitën që e kishte, 11.

Kundërshtarja e radhës për Shqipërinë, Danimarka, ka rënë për një pozitë dhe tani gjendet në pozitën e 27, derisa Serbia ka rënë për tre pozita për t’u renditur e 34-ta.

Rënie të madhe ka pasur Armenia (-16) e cila tani gjendet shtatë pozita më poshtë se Shqipëria.

Në krye të renditjes mbetet Gjermania, e ndjekur nga Argjentina, kurse në TOP 3 është ngjitur Kolumbia që e ka tejkaluar Holandën.

Shqipëria renditjen më të lartë në historinë e saj e kishte në korrik të vitit 2013, kur ishte renditur e 37-ta.

Renditja e FIFA-s për muajin shtator