S’mund ta blejë çdokush

Ish kampion i Europës me Danimarkën në vitin 1992, tani kryetrajner i Swanseat, Michael Laudrup, ka thënë se shumë pak skuadra në Europë do të mund të blenin Michun kur të donë. 

Shkëlqimi i spanjollit të panjohur që erdhi si në hije në Premier League ka lënë gojëhapur të gjithë kritikët. Ish lojtari i Rayo Vallecanos dhe Celta Vigos ka shënuar 16 gola për gjysmë stinor në Angli, duke llogaritur të gjitha garat deri më sot. Ndërsa goli i tij i djeshëm ndaj Chelseat, vetëm se ka treguar cilësitë e tij para portës kundërshtare. 

“Sipas situatës ekonomike që po mbretëron, shumë pak skuadra mund ta blejnë atë kur të duan. Janë disa në Angli, dy në Spanjë, në Itali s’ka kush e blen, ndërsa në Gjermani vetëm Bayerni… shumë pak ekipe kanë para për atë,” ka thënë danezi Laudrup një ditë pas fitores së madhe të ekipit të tij ndaj Chelseat në Stamford Bridge.