BETIS - BARCELONA
Suarez shpëton Barcelonën nga humbja
29 January, 2017 @13:51
Me befasi ka filluar dita e diel në La Liga.
Pas Atleticos që u ndal pa gola mbrëmë nga Alavesi, pikë këtë xhiro ka lëshuar edhe Barcelona, duke bërë kështu që kjo fundjavë në Spanjë të quhet ‘fundjava e Real Madridit’, edhe pse ky i fundit ndeshjen e xhiros nuk e ka luajtur ende.
Barcelona barazoi 1-1 ndaj një Betisi shumë të mirë sot, i cili kishte më shumë goditje në portë se Barcelona dhe ishte shumë i disciplinuar në mbrojtje. Goli i Betisit u shënua nga Alegria 15 minuta para fundit, derisa Barcelona golin e barazimit e gjeti në fund të takimit përmes uruguajanit Luis Suarez. Duhet të pëmendim që Barcelonës nuk iu akordua një gol i rregullt, me arsyetimin që topi nuk e kishte kaluar vijën. Pas përsëritjeve televizive u pa qartë që topi e kishte kaluar vijën dhe Barcelona ishte penalizuar, me La Ligën që nuk e ka ende teknologjinë në vijën e portave.
Për Betisin i plotë në këtë ndeshje ishte edhe futbollisti shqiptar me nënshtetësi daneze, Riza Durmishi.
Ky barazim bën që Barcelona ta bëjë një hap prapa në luftën për titull, kur dihet që momentalisht Reali i ka 2 ndeshje më pak të zhvilluara dhe diferenca mund të rritet.
