Superkupa e Spanjës i takon Realit

Të relaksuar pas fitores 1-3 në ‘Camp Nou’, Real Madridi ka zhvilluar një paraqitje të shkëlqyeshme sonte dhe e ka fituar edhe takimin kthyes ndaj Barcelonës në kuadër të Superkupës së Spanjës, për ta shtuar në koleksionin e vet edhe një tjetër trofe.

Përkundër faktit që ndeshjen e startuan pa Iscon, Ronaldon, Balen e Casemiron, epërsia e madrilenëve erdhi që në fillim të takimit pas super goditjes së Asensios me të majtën, ndërsa për 2-0 u përkujdes Karim Benzema dhe që nga ai momenti ndeshja më nuk pati histori.

Në anën tjetër, Barcelona në pjesën e parë nuk rrezikoi pothuajse asnjëherë, ndërsa në të dytën katalunasit e goditën 2 herë shtyllën, por goli nuk erdhi në asnjë moment dhe ndeshja u mbyll me rezultatin përfundimtar 2-0, duke bërë që trofeu t’i takojë Real Madridit.

Ky është trofeu i 7 për Zidanen si trajner i Real Madridit nga gjithsej 9 të mundshëm, ndërsa kjo është hera e 10 në histori që Reali e fiton Superkupën e Spanjës.