Ta fitojmë Kupën e Botës për Neymarin

Fitorja e mbrëmshme braziliane sa solli gëzim, aq edhe dhimbje te Kariokët. Kjo pasi që sulmuesi kryesor i këtij vendi, Neymar, pësoi një lëndim të rëndë në shpinë dhe nuk do të jetë i aftë për të vazhduar Botërorin në vazhdim. 

Brazili mposhti Kolumbinë 2-1 në çerekfinale dhe tani më në gjysmëfinale do të ndeshet me Gjermaninë, që eliminoi Francën dje. 

E kapiteni i skuadrës, Thiago Silva, ka kërkuar nga bashkëlojtarët që Brazili të fitojë gjithsesi kampionatin dhe titullin t’ia kushtojë golashënuesit të tyre më të mirë në këtë kampionat. 

“Neymar është shumë i rëndësishëm për ekipin tonë. Ne varemi shumë te ai. Mirëpo, në këtë situatë ne duhet të bëjmë revolucion dhe të fitojmë Kupën e Botës për Neymarin,” është cituar të ketë thënë kapiteni i brazilianëve, Thiago Silva, sot nga mediat e nikoqirëve të kampionatit. 

Silva, gjithashtu nuk do të jetë në gjendje t’i ndihmojë Brazilit në ndeshje ndaj Gjermanisë në gjysmëfinale, kjo pasi që ai është i suspenduar për shkak të kartonave të verdhë.