GJAKOVË
Themeli vihet, nis pritja për stadiumin e Vëllaznimit me investim milionësh
21 May, 2020 @19:40
Sot edhe solemnisht në Gjakovë është vendosur gurthemeli për fillimin e punimeve për ndërtimin e stadiumit të ri modern të qytetit të Gjakovës.
KF Vëllaznimi që po lufton për mbijetesë në Ligë të Parë të Kosovës, tash e tutje pritet të ketë stadiumin modern.
Ministrja e Sportit të Kosovës Vlora Dumoshi ka treguar se ka vendosur gurthemelin për stadiumin e ri të qytetit të Gjakovës, investim ky që kalon shifrën e 1 milionë eurove.
Kreu i qytetit të Gjakovës në statusin e tij nuk ka përmendur shifra. Ai ka thënë se është një objekt me të cilin do të krenohet Gjakova.
Në anën tjetër sportdashësit dhe adhuruesit e Vëllaznimit mirëpresin një investim të tillë në qytetin e Gjakovës.
Mirëpo, mbetet të shihet se kur do të përfundojë një projekt i tillë, pasi që ka qytete shembuj, si Prizreni, ku me vite të tëra s’kanë përfunduar këto punime.