“Unë jo, kujtesa ime e mbrojti penalltinë”

Befasia Kosta Rika ka arritur të tetën e finales duke e mposhtur Greqinë pas penalltive dje. 

Portieri i këtij vendi, Keilor Navas, u bë hero në vend pasi që priti penalltinë e sulmuesit me përvojë grek, Theofanis Gekas, që doli të jetë vendimtar në fitoren e ekipit të tij dhe kualifikimit historik në çerekfinale. 

Mirëpo, ai ka pranuar se këtu nuk ka pasur kurrëfarë problemi, pasi që për një gjë të tillë i ka ndihmuar kujtesa. 

“Kam qenë bashkëlojtar me Gekasin te Levante. Mbrëmë mu kujtua se si i godet ai penalltitë, nga koha derisa kemi stërvitur te Levante. Pasi që ai gjithmonë godistë në vend të njejtë, nuk e kam pasur vështirë t’ia lexojë shutin. Këtë penallti e kam mbrojtur vetëm falë kujtesës sime,” ka thënë Navas, transmetojnë mediat e huaja sot. 

Për më tepër, Gekas i cili luan në Superligën turke ka marrë edhe një njoftim nga një lojtar i Akhisar në Turqi para se të shutojë penalltinë. 

“Gekas si golashënues është mjeshtër i vërtetë, por penalltinë kurrë s’di ta shënojë. Nuk do ta shikojë portierin dhe do të gjuaj në anë të djathtë të tij,” ka shkruar ish bashkëlojtari i grekut, Cagdas Atan, në Twitter pak para se të shutojë penalltinë Gekas. 

Cicërima e lojtarit turk u shpërnda brenda disa sekondave mbi 320 herë në Twitter. 

Gekas ka qenë i vetmi që ka dështuar të shënojë nga penalltia në ndeshjen Kosta Rika - Greqia, që ishte e mjaftueshme për kualifikimmin e Kosta Rikës dhe eliminimin e Greqisë nga Botërori “Brazili 2014”.