Unitedin do ta lëmë pas

Trajneri kilian, Manuel Pellegrini, në konferencën e tij të parë si trajner i Manchester Cityt është shprehur mjaft optimist për ekipin e tij.

Pasardhësi i Roberto Mancinit beson se skuadra e tij e ka forcën e duhur për ta lënë pas kampionin, Manchester Unitedin, dhe për t’u stolisur me titullin e kampionit.

“Besoj se David Moyes do të bëjë punë të mira te Manchester Unitedi. Gjithashtu edhe Mourinho ka njohuri të mjaftueshme në Premier League për të arritur deri te suksesi,” ka thënë Pellegrini për homologët e tij nga rivalët kryesorë.

“Pesë apo gjashtë skuadra kanë gjasa që ta fitojnë titullin në Premier League. Përveç nesh, Unitedi, Chelsea, Arsenali dhe Tottenhami kanë gjasa për të triumfuar në fund. Po ashtu mund të del edhe ndonjë skuadër tjetër si surprizë. Ne do të bëjmë ç‘mos për të fituar. Gjithashu e di se edhe derbi i Manchesterit ka shumë rëndësi. Edhe do ta mposhtim Unitedin, edhe do të përfundojmë sipër tyre,” u shpreh kiliani 59 vjeçar.

Pellegrini u emërtua kryetrajner i Manchester Cityt javë më parë, pasi u largua nga skuadra e Malagas.