Van Gaal vs. Klopp

​Sonte me fillim nga ora 21:05, dy skuadrat më të mëdha angleze do të përballen mes veti, fatkeqësisht në një kompeticion më të vogël se Champions League, aty ku të dy skuadrat kanë bashkë 8 trofe.

Pak para sfidës, le të shohim disa krahasime mes dy trajnerëve.

Në Premier League, Van Gaal dhe Klopp patën vetëm një përballje, e cila u mbyll me fitoren e United me rezultat 0-1. Por përballje mes tyre teknikët patën edhe në Bundesligën gjermane, me holandezin drejtues të Bayernit e gjermanin drejtues të Dortmundit.

Dortmund 1-5 Bayern München - 12 shtator 2009 (sezoni 2009/2010)

Humbja më e thellë e Kloppit në Bundesligë u shkaktua pikërisht nga Louis Van Gaal. Dortmund kalun në epërsi të parët, mirëpo Bayerni i Van Gaal shënoi 5 herë, për ta deklasuar Dortmundin.

Bayern München 3-1 Dortmund - 13 shkurt 2010

Ndeshja e kthimit e sezonit të njejtë. Humbja e dhjetë radhazi e Kloppit në përballjet personale ndaj Bayernit dhe një fitore e Van Gaali e cila erdhi përsëri me përmbysje. Madje ishte pikërisht ky sezoni, në të cilin Bayerni shkoi në finalen e Champions League, për t’u mposhtur në Bernabeu nga Interi i Mourinhos.

Dortmund 2-0 Bayern München 3 tetor 2010 (sezoni 2010/2011)

Fitorja e parë e Kloppit ndaj Bayernit, fitore e cila e shtoi vetëbesimin e skuadrës nga Signal Iduna Park dhe ishte një hap i madh drejt sukseseve në vitet në vijim.

Bayern München 1-3 Dortmund 26 shkurt 2011 

Fitore e cila e mbylli çështjen e titullit në Gjermani, me Dortmundin që u shpall kampion në fund të sezonit. Një fitore e madhe e Kloppit në “Allianz Arena”, me skuadrën e Dortmundit me moshë mesatare 22.4 vjet. Edhe holandezi Van Gaal e pranoi që fitorja e mysafirëve ishte plotësisht e merituar.

Këto ishin të gjitha përballjet mes Kloppit e Van Gaalit. 3 fitore të Van Gaal, 2 të Klopp dhe asnjë barazim.

Pasioni i Klopp apo përvoja e Louis Van Gaal, se cila do të triumfojë në ndeshjen mes Liverpoolit e Unitedit sonte në Europa League mbetet të shihet. Ky trofe cilësohet si “shpëtim i sezonit” për të dyja skuadrat dhe ndeshja garanton spektakël.