Zeka kthen kampionin te fitorja

Sulmuesi gjakovar i kampionit të Kosovës, Mevlan Zeka, e ka kthyer Feronikelin te fitoret.

Ekipi i Afrim Tovërlanit qe dy xhiro nuk kishte shijuar fitoren ndërsa sot në derbin drenicak Feronikeli në “Rexhep Rexhepi’ me një gol të bukur të Zekës shënoi fitoren e dhjetë të stinorit në total.

TABELA AKTUALE

Feronikeli dominoi në pjesën më të madhe të ndeshjes, ndërsa kthimi i Mentor Zhdrellës u pa në fushë dhe në mundësitë e ekipit nga Drenasi, derisa Drenica kryesisht tentoi nga kundërsulmet, ku Granit Arifaj nuk gjeti portën e Deniz Troshupës në disa momente për të shënuar.

Ky ka qenë goli i dytë i Zekës këtë stinor për Feronikelin.

Me këtë fitore, Feronikeli mbledh 32 pikë pas 16 xhirove, ndërsa Drenica mbetet në 18, duke e përjetuar humbjen e gjashtë të stinorit sot.

Në xhiron e radhës Feronikelin e pret derbi ndaj Prishtinës lidere, derisa Drenica pret Ferizajin në formë.