Zhdrella te Drita

Njëri ndër mesfushorët më të mirë që ka prodhuar Kosova në vitet e fundit, Mentor Zhdrella, është futbollisti më i ri i Dritës së Gjilanit. 

Ish ylli i Hysit me shuarjen e klubit kishte mbetur pa angazhman derisa e kishin kërkuar shumë skuadra kosovare, në mes të tyre edhe kampionja aktuale Prishtina - por pa sukses. 

Sot ai në llogarinë e tij personale në rrjetin social Facebook, ka bërë të ditur se ka nënshkruar me ekipin gjilanas, Drita. 

Drita që udhëhiqet nga Arbnor Morina tashmë do ta ketë në dispozicion edhe një mesfushor ideal që është me tipare sulmuesi, derisa me transferimin e tij bardhekaltërit nga Gjilani përfitojnë tani edhe nga gjuajtjet e lira - gjë të cilën e ka specialitet Zhdrella. 

Zhdrella është zgjedhur futbollisti më i mirë i vitit në Kosovë nga Federata e Futbollit të Kosovës katër herë në pesë vitet e fundit. 

Drita ndërkaq, në pjesën pranverore nuk ka arritur ende të shijojë fitoren pasi që në katër ndeshjet e para ka regjistruar vetëm një pikë dhe atë si vendas - derisa tre ndeshjet tjera të zhvilluara si mysafir i ka humbur. Ekipi i Arbnor Morinës gjindet në pozitën e shtatë të tabelës së klasifikimit me 27 pikë nga 21 ndeshje dhe në xhiron e radhës pret Drenicën në Gjilan.