ALARM! françez

Franca është në krizë. Ndërsa, e përditshmja më e njohur françeze, L’Equipe, pas humbjes ndaj Ukrainës në ndeshjen e parë të barazhit 2-0 në Kiev, ka dalë me titull, “ALARM I KUQ”. 

“Ata na treguan se nuk e kanë nivelin e një përfaqësueseje për të luajtur në Brazil, sepse nuk ia arritën të dalin ballëlartë nga një ndeshje e tillë,” ka thënë Franck Leboeuf, që ka qenë qendërmbrojtësi i Francës në KB Franca 1998, kur u bë vendi i tij kampion botëror. 

“Ne u mposhtëm nga kundërshtari në çdo aspekt - në ritëm, në lojë me top, në dyluftime dhe në starte. është e tmerrshme. Sa më shumë i afroheshim fundit të ndeshjes, Ukraina aq më shumë dominonte,” kanë qenë fjalët e fituesit të KE 1984 me Francën, legjendës, Bernard Lacombe, transmeton L’Equipe. 

E Alain Giresse, anëtar i ‘katrorit magjik’ të njëhershëm të Francës, në kohën e Michel Platinisë, Jean Tiganasë dhe Jean Fernandezit, ka vënë në pyetje dëshirën e lojtarëve. 

“Franca nuk ka përmbushur kërkesat e një ndeshjeje të tillë. Ndoshta as dëshira nuk do të mund të kryente punë. Nivelin e intensitetit të një ndeshjeje të tillë duhet ta keni parasysh shumë më herët, duhet të jeni gati për një lojë të tillë,” ka thënë ai. 

Franca tani pret Ukrainën të martën në Paris për ndeshjen e kthimit të Play Offit. Avantazhi prej 2-0 i Ukrainës nga fitorja e së premtes në mbrëmje, do të thotë që Franca duhet të fitojë me rezultat 3-0 (ose cilido rezultat me tre diferencë) për të marrë biletën për Brazil. Në rastin më të lehtë, Franca duhet të arrijë rezultatin 2-0 dhe pastaj të kërkojë fatin në vazhdime.