Arsenali shpëton në Stamboll

Demba Ba, sulmuesi i ri i Besiktasit, ka qenë vetëm disa milimetra jo i saktë, për të shënuar golin më të shpejtë në histori të futbollit. 

Ai që në prekjen e parë të tij të topit goditi shtyllën e Arsenalit, duke e zënë Wojciech Szczeznyn e papërgatitur. Bardhezinjtë e Stambollit kishin iniciativën në lojë dhe duke shfrytëzuar tifozët e zhurmshëm, shkonin mbi Arsenalin. 

Mirëpo, kur ata nuk arritën të shënojnë edhe pas rasteve ideale, përsëri të Demba Ba-së, pastaj edhe Olcay Sahan, atëherë nga minuta e 70-të e tutje - Topçinjtë morrën kontrollin e ndeshjes dhe rrezikuan për të shënuar dy herë portën e Shqiponjave të Stambollit, që falë portierit të tyre Tolga Zengin - mbetën të pamposhtur. 

Alex Oxlade Chamberlain, që hyri si zënvedësues dhe Santi Cazorla nga gjuajtja e lirë, patën rastet më të mira për ekipin e Arsene Wengerit, ku ky i pari qëlloi shtyllën e turqve. 

Kjo ka qenë ndeshja e parë e Play-Offit, derisa ajo e kthimit ndërmjet këtyre dy skuadrave që përcakton pjesëmarrësin në Ligë të Kampionëve 2014/15 luhet javën që vjen në Londër.