Atletico Madrid, lider

Mesfushori i ri 21 vjeçar i Atletico Madridit, Jorge Resurrecion Merodio, shumë më i njohur si Koke, ka shënuar golin e vetëm të ekipit të tij sot në ndeshjen e parë të La Ligas për Vitin 2014 për ta bërë ekipin e tij lider të ligës elite të Spanjës. 

Koke ka shënuar në pjesën e dytë të ndeshjes, saktësisht në minutën e 70, gol ky që u tregua të jetë i vetmi në ndeshje dhe i vlefshëm për tre pikë që çojnë në krye ekipin e Diego Simeones, para Barcelonës dhe Real Madridit, me një ndeshje më pak. 

“Malaga ishte e lumtur që na e posedonim topin, ndërsa ata kërkonin gol me kundërsulme,” ka thënë Diego Simeone pas ndeshjes. 

“Pak vështirë po vimë te goli, mirëpo me luftë ekipore po e arrijmë këtë. Ne do të vazhdojmë kështu ndeshje pas ndeshjeje dhe do të presim që Barcelona të fitojë nesër e përsëri të del në krye,” ka thumbuar Simeone. 

Atletico Madrid ka 49 pikë nga 18 ndeshje dhe gjindet në krye të tabelës së La Ligas. Barcelona mund të rikthehet në krye të tabelës nëse e mposht Elchen nesër në Camp Nou. 

Rezultatet dhe tabela aktuale.