Babai i Haalandit dhe Raiola aterojnë në Barcelonë

Babai i sulmuesit norvegjez të Borussia Dortmundit Erling Haaland dhe agjenti i tij Mino Raiola, janë fotografuar sot nga mediat spanjolle duke arritur në Barcelonë.

Pas spekulimeve të shumta për një kalim të norvegjezit në një klub të madh, duket se një transfer i tij potencial drejt ekipit katalonas që tashmë ka kryetar të ri të klubit, mund të ndodhë.

Shifrat e para të raportuara janë se kalimi i tij do t’i kushtojë Barcelonës rreth 160 milionë euro dëmshpërblim.

Haaland 20-vjeçar ka shënuar 49 gola në po aq ndeshje për Borussia Dortmundin, prej se erdh aty nga Salzburgu austriak.

Ekipe tjera të interesuara që janë përmendur si të ndërlidhura me Haalandin janë Real Madrid, Manchester United dhe Chelsea.

Por ajo që shihet prej fotografive të sotme, duket se Haaland ka treguar synimin e tij primar.