Barcelona shpëton me barazim, mallkimi vazhdon

Një nga ato ndeshjet e rralla ku mund të themi që Barcelona ishte me fat që doli me pikë nga fusha!

Ashtu siç ka ndodhur që nga viti 2007 e tutje, Sociedadi u tregua një arrë e fortë për Barcelonën, duke e dominuar takimin, duke krijuar më shumë raste për shënim e në fund duke mos e lejuar Barcelonën që të largohet me 3 pikë nga qyteti bask.

Dominimi i Sociedadit ishte që nga fillimi, ndërsa goli i epërsisë u shënua nga Willian Jose në pjesën e dytë. Goli i Barcelonës erdhi nga Leo Messi, i cili e shfrytëzoi mirë një top të pranuar nga Neymar, ndërsa ky ishte një nga shumë pak sulmet që Barcelona i krijoi sonte.

Më pas, Sociedadi vazhdoi ta kërkonte golin e fitores, por nuk e gjeti në asnjë moment. Duhet përmendur që baskëve iu anulua një gol plotësisht i rregullt nga gjyqtari anësor, me pretekst se kishte qenë pozicion jashtë loje, por që në përsëritje u pa që goli ishte i rregullt.

Ky barazim bën që Barcelona ta luajë ‘El Clasicon’ në një moment kur ka 6 pikë më pak se Real Madridi lider.

TABELA AKTUALE LA LIGA

All Goals Real Sociedad 1-1 FC Barcelona - 27… by milena-georgieva1