Berisha kalon Adelaide United

Besart Berisha ka qenë për 90 minuta në fushë në fitoren e posashënuar të ekipit të tij Brisbane Roar 1-2 si mysafir i Adelaide United, për të dalë në gjysmëfinale të Play-Offit të A-Legaue. 

Luke Brattan dhe Ivan Franjic kanë shënuar nga një gol në pjesën e parë për ekipin e Besartit, ndërsa krejt në fund në minutën e 89-të, Dario Vidosic, ka zbutur epërsinë për Adelaide, por ishte tepër vonë. 

Besarti ka pasur një paraqitje solide, duke u dalluar posaçërisht në 15 minutat e fundit, kur ekipi i tij me kundërsulme ka mundur të shënojë disa herë. 

Ai dy herë me pasime, la vetë bashkëlojtarët e tij para portierit, Eugene Galekovic, të cilët nuk arritën të shënonin. Ndërsa një herë ishte gati të shënojë me kokë pas krosimit nga ana e majtë, të cilën gjithashtu e ndali portieri i vendasve. 

Brisbane Roar përkundër stinorit jo të shkëlqyeshëm, ka arritur të hyjë në Play-off dhe tani kaloi çerekfinalet për të dalë në gjysmëfinale. Besart Berisha deri më tani ka shënuar 14 gola për ekipin e tij këtë stinor.  

A LEAGUE, SOT - ÇEREKFINALJA