Disfatë në Suedi, e katërta në gjashtë në ndeshje

Në një atmosferë shumë të mirë sportive në Stokholm, ku të pranishëm ishin edhe mijëra përkrahës të Kosovës, Kosova u mposht me rezultat 3-0 nga Suedia. Takimi ishte i vlefshëm për fazën grupore kualifikuese drejt Botërorit të Katarit. Me të njëjtin rezultat Suedia na kishte mposhtur edhe në Prishtinë në muajin mars.

Ndonëse kontrolli i ndeshjes ishte te Suedia, që me treshen kualitative Forsberg - Kulusevski- Isak tentonte ta gjente golin, rastin e parë serioz për shënim në ndeshje e pati Kosova. Pas një topi të ardhur nga Milot Rashica prej krahut të djathtë, Elbasan Rashani rrezikoi (17’) me një gjuajtje, e cila përfundoi shumë pranë portës.

E goli suedez erdhi në minutën e 29’ përmes një penalltie tejet të diskutueshme. Me ndihmën e VAR-it, gjyqtari italian Marco Di Bello çuditërisht akordoi penallti për suedezët, nga e cila i saktë u tregua Emil Forsberg.

Pas golit të pësuar, Kosova dalëngadalë filloi të rritej në lojë, por porta suedeze mbeti e paprekur dhe pjesa e parë u mbyll 1-0.

TABELAT E GRUPEVE

Pjesa e dytë për Kosovën filloi mjaft mirë. Përfaqësuesja dardane rrezikonte kryesisht me topa të ardhur nga krahu i djathtë. Ndër të tjera raste të Kosovës, në minutën e 57’ Vedat Muriqit iu anulua një gol për shkak të pozitës jashtë loje.

Në momentet më të mira të Kosovës, Suedia e gjeti golin e saj të dytë. Brilianca individuale e Alexander Isak bëri që epërsia suedeze të dyfishohej. Ky i fundit shënoi një gol tejet të bukur me të djathtën në minutën e 62’ të takimit, gol që praktikisht e mbylli ndeshjen.

Më vonë gjatë ndeshjes, Suedia shënoi edhe një herë. Ishte futbollisti Quaison ai që shënoi për 3-0 (79’), pak minuta pas inkuadrimit në lojë, gol që doli të ishte i fundit i ndeshjes.

Për herë të parë me fanellën e Kosovës sonte luajtën Astrit Selmani e David Domgjoni, të inkuadruar në lojë në pjesën e dytë në vend të Zymer Bytyqit, respektivisht Mërgim Vojvodës.

Për Kosovën kjo ishte humbja e katërt në gjashtë ndeshjet e zhvilluara deri më tash në Grupin B kualifikues.

Ndeshjen e ardhshme në grup Kosova e luan të martën (12 tetor) ndaj Gjeorgjisë në “Fadil Vokrri”. Në atë ndeshje te Kosova do të mungojë Florent Hadërgjonaj për shkak të kartonit të verdhë që e mori sonte.