Disiplinorja përjashton Arianit Ahmetin nga FFK-ja

Përmes një njoftimi të lëshuar nga Komisioni Disiplinor i FFK-së, është bërë e ditur se Arianit Ahmeti, është përjashtuar nga FFK-ja.

Në Vendimin e KD-së thuhet: Arianit Ahmeti në procedurë të hapur disiplinore pas shkarkimit nga Komiteti Ekzekutiv për shkelje të statutit të FFK-së neni 12 pika I, shkelje të kodit të etikës neni 5 dhe 6: dënohet me masën disiplinore, përjashtim nga organizata e futbollit bazuar në nenin 63 paragrafi 1, pika 4.

Ndërsa në arsyetimin e KD-së shkruan: Komisioni disiplinor ka konstatuar se i lartpërmenduri ka shkelur nenin 106 të Rregullores Disiplinore, ku ka anuluar vendimin e Komisionit Disiplinor të datës 05.11.2019 , duke cenuar nenin 41, paragrafi 2, pika a të statutit të FFK-së. Po ashtu i njëjti ka shkelur rëndë nenin 13 të kodit të etikës, duke u deklaruar për media pa autorizim nga ana e udhëheqësve të futbollit. Po ashtu i njëjti ka shkelur nenin 5 dhe 6 të kodeksit ku parashihet se të gjithë anëtarët e organizatës së futbollit duhet të veprojnë në përputhshmëri të këtyre neneve.

Pas këtij Vendimi, Ahmeti do të ketë mundësi që brenda tetë ditëve të ankohet në Komisionin e shkallës së dytë të FFK-së.

Ahmeti u shpreh hapur kundër kreytarit të tashëm të FFK-së, Agim Ademi, duke thënë se mandati i tij skadon në janar të vitit të ardhshëm dhe kërkonte që të mblidhte Kuvendin e punës për të votuar kryetarin e ri të FFK-së, për të cilin do të kandidonte vetë. Në anën tjetër, Ademi konfirmonte se UEFA e FIFA e njohin atë për kryetar të FFK-së në mandatin e plotë, 2018-2022.

Ahmeti ka qenë zëvendës sekretar i FFK-së.