Drita fiton, krijon distancë për qetësi

Drita po vazhdon të marshojë drejt titullit të kampionit të Kosovës. Ekipi gjilanas sot ka ngritur epërsinë në krye të klasifikimit për gjashtë pikë karshi ndjekësit të parë Prishtinës, pasi që mposhti Besën në Shahin Haxhiislami të Pejës.

Përforcimi i ardhur gjatë dimrit, Haxhi Neziraj, ka shënuar golin e epërsisë për ekipin e drejtuar nga Bekim Isufi, ndërsa shpejt Astrit Fazliu ka shutuar nga largësia për të rehatuar ekipin me diferencë dy golëshe para fundit të pjesës së parë.

TABELA AKTUALE

Në pjesën e dytë, Besa përkundër se kërkoi, nuk kishte fuqi për të bërë më shumë ndaj gjilanasve në formë, që nuk dinë për humbje në Superligë që nga shtatori i vitit të shkuar, dhe u pajtuan me humbjen e 18 të stinorit.

Drita tash ka 50 pikë nga 26 xhiro, ndërsa deri në fund të stinorit kanë mbetur edhe shtatë xhiro. Në ate të radhës, Drita pret Vllazninë e fundosur, ndërsa Besa luan si mysafire e Prishtinës.