TREPÇA89 0-2 DRITA
Drita rikthen kreun me fitoren e parë të stinorit ndaj ‘89-shit
14 June, 2020 @19:00
Drita ka shënuar fitoren e parë të stinorit ndaj Trepçës’89 dhe atë në momentin më të duhur për skuadrën.
Ekipi i Ardian Nuhiut ka mposhtur Trepçën’89 të rrezikuar për rënie 0-2 [Xhevdet Shabani 17, Kastriot Rexha 69] në Riza Lushta të Mitrovicës, duke rikthyer kreun e tabelës, për ta rrëzuar Prishtinën poshtë pas një dite sa e mbajtën këtë pozitë kryeqytetasit.
Xhevdet Shabani me goditje maestrale nga gjuajtja e lirë i dha epërsinë Dritës heret në takim, kur shënoi në minutën e 17 të ndeshjes. Kjo bëri që gjilanasit të kontrollojnë ndeshjen, ndërsa mitrovicasit në kërkim të pikëve jetike të hapen në lojë.
‘89-shi kishte rast të mirë për të barazuar në minutën e 28 të ndeshjes me golashënuesin më të mirë të tyre dhe të ligës, Arb Manaj. Por, tentimi i tij u ndalë nga portieri i Dritës.
Pas kësaj golashënuesi i golit të parë pat edhe një rast për të “këputur” ndeshjen para fundit të pjesës së parë (38’), por rasti i tij ideal - shkoi huq.
Pjesa e dytë nisi me tentim të mirë të ekipit të Shpëtim Idrizit, kur Ardian Muja (50’) tentoi, por që u prit nga portieri Maloku i Dritës.
Pas kësaj Drita rimerr iniciativën në ndeshje dhe gati 20 minuta para fundit të saj pas një asistimi të Astrit Fazliut, ujku i vjetër i golave, Kastriot Rexha shënon për të garantuar fitoren e Dritës në minutën 69 të takimit.
Deri në fund të ndeshjes pati disa ndërprerje për shkak të faulimeve dhe kartonëve, kurse ‘89-shi e kreu duelin me 10 lojtarë, pasi që Richard Asare i tyre mori kartonin e dytë të verdhë 10 minuta para fundit të takimit.
Duke llogaritur dy kartonat e Asares, referi shpërndau edhe 6 të tjerë në duel prej të cilave katër ishin për lojtarët e Dritës.
Në xhiron që vjen Drita pret Ferizajin si vendas, kurse Trepça’89 do të ketë punë të vështirë ndaj ekipit pretendent për titull dhe gara evropiane, Ballkani.