Feronikeli i kthehet fitores dhe vendit të dytë

Me trajnerin e ri, Ramiz Dervishi, Feronikeli i është kthyer fitores sot në Rexhep Rexhepi duke shënuar fitore të thellë ndaj Besës së Pejës, 4-1.

Fitorja e Feronikelit u paralajmërua heret kur nisën sulmet që nga minutat e para të ndeshjes dhe rastet e vendasve.

Kështu, Labinot Osmani shënoi nga gjuajta e lirë për avantazhin fillestar, 1-0, ndërsa në fund të pjesës së parë i riu Diar Prokshi shtoi epërsinë në 2-0.

Besa nuk krijoi shumë, ndërsa Feronikeli edhe në pjesë të dytë shënoi me zëvendësuesin Mevlan Zeka që u fut në pjesë të dytë në lojë. Zeka shënoi për 3-0.

TABELA AKTUALE

Fatih Karahoda shënoi golin e nderit për Besën më pas. Karahoda ka qenë më i dalluari te ekipi pejan sot dhe shënoi pas një asistimi të Leart Eminit për 3-1.

Sidoqoftë, për Besën nuk kishte shpresa. Zëvendësuesi tjetër, Yll Hoxha, posa hyri në lojë në rastin e parë serioz shënoi për 4-1. Më pas rrezikoi edhe njëherë portën e Granit Kolshit.

Besa sidoqoftë vazhdoi me sulme për të tentuar edhe një gol, por assesi nuk gjeti golin përkundër rasteve që kishte.

Në fund, Feronikeli shënoi fitoren e 19 të stinorit për të çuar pikët në 61. Besa regjistroi humbjen e 9 të stinorit.

Feronikeli në xhiron që vjen është mysafir i Llapit në Podujevë, ndërsa Besa pret liderin, Trepça’89.