City i treti, Pep për LK, Sam s’e njeh ekipin

Manchester City ka shënuar fitore të thellë ndaj Crystal Palace‘it sot në Etihad, 5-0. Golat e shumtë të shënuar nga City i dhanë hijeshi fitores si vendas, ndërsa çuan ekipin e drejtuar nga Pep Guardiola në pozitë të tretë, me golaverazh më të mirë sesa Liverpooli.

“Performancë e nivelit të lartë. Jam i kënaqur që njerëzit në stadium më në fund u shpërblyen me gola të shumtë këtu. Chelsea, Tottenham, City, Liverpool, United, Arsenal, por edhe Everton… shumë është me rëndësi të luajmë në Ligë të Kampionëve. E gjitha është në dorën tonë,” ka thënë ndër të tjera Guardiola pas ndeshjes i kënaqur me fitoren e ekipit të tij.

David Silva ka qenë maestral sot në fitoren e ekipit të tij. Mesfushori spanjoll ka hapur serinë e golave të Cityt që në minutën e dytë të takimit, ndërsa ka dhënë leksion futbolli në ndeshje për të gjithë.

E Sam Allardyce nuk e njohu ekipin e tij që po e drejton.

“Sistemi jonë nuk gaboi. Gaboi mbrojtësi, që nuk e hoqi topin dhe ata shënuan shpejt. Unë nuk e njofta ekipin tim sot. Ata nuk ishin të njejtit e këtyre dy muajve të fundit,” kanë qenë fjalët e tij pas ndeshjes.

TABELA E PREMIERLEAGUE

Crystal Palace është duke kërkuar shpëtimin nga rënia prej Premier Ligës. Tashmë kur u kanë mbetur edhe 2 ndeshje për të zhvilluar, ata janë 4 pikë para Hull Cityt dhe 6 nga Swansea, që është në zonë të rënies.