GJILANI - LLAPI
Gjilani triumfon ndaj Llapit, bëhet lider
23 October, 2019 @16:42
Skuadra e Gjilanit, duke e mposhtur Llapin me rezultat 3-0, është ngritur në krye të tabelës.
Djelmoshat e trajnerit Gentjan Mezani, treguan një lojë të bukur kundër Llapit dhe pa problem triumfuan ndaj kundërshtarit.
Goli i parë i gjilanasve erdhi në minutën e 41’, pas një tollovie në zonën e Llapit, rastin e shfrytëzoi sulmuesi Tomislav Busiç dhe kështu u mbyll pjesa e parë me rezultat 1-0.
Në minutën e 72’, Bedri Greca shënoi golin e dytë të Gjilanit, por asistimi i Erlis Frashërit ia kishte lehtësuar punën totalisht Grecës.
Goli i tretë i Gjilanit erdhi përmes një solo aksioni nga Gerhard Progni. Ai pas disa driblimeve arriti ta mposhtë portierin Afrim Ademi për ta realizuar golin e tretë të skuadrës.
Me këtë fitore Gjilani ngritet në pozitën e parë në Superligë me 24 pikë, ndërsa Llapi mbetet në kuotën e 20 pikëve.
Në xhiron tjetër Gjilani takohet me Trepçën ‘89, kurse Llapi me Vushtrrinë.
