KRYEQYTET
Hajvalia njofton Prishtinën me humbje në pranverë
11 April, 2015 @15:56
Hajvalia ka arritur të shënojë fitore me rezultat 2-0 ndaj Prishtinës, për të regjistruar fitoren e parë në histori të klubit ndaj ekipit më të trofeshëm në vend.
Penalltia e akorduar në fund të pjesës së parë, ia dha epërsinë Hajvalisë. Ka qenë Shkëlqim Pacolli me depërtim në zonë, që u ndalë nga mbrojtja bardhekaltër, për tu shkaktuar njëmbëdhjetëmetërshi.
Fillim Guraziu, shënuesi më i mirë i Hajvalisë, dërgoi topin në një anë, ndërsa portieri i Prishtinës shkoi në anën tjetër për të përmbyll 45 minutat e para me epërsi.
Në pjesë të dytë Prishtina u hap edhe më shumë, derisa Hajvalia tentoi me kundërsulme, duke krijuar një mori rastesh.
Semir Zeneli së pari goditi shtyllën nga një rast, ku e pati më lehtë të shënoj, por sidoqoftë ai u gjet më së miri në minutën e 75-të të ndeshjes kur pas dy-tre goditjeve drejt portës prishtinase, shënoi për rezultatin përfundimtar 0-2.
Me këtë fitore Hajvalia është ngritur në pozitën e tretë të klasifikimit, derisa Prishtina tashmë ka pësuar humbjen e parë në pranverë dhe mbetet 6 pikë larg Ferronikelit lider.
