Hysaj: Mundësi e artë për të fituar grupin!

Mbrojtësi i kombëtares shqiptare, Elseid Hysaj, në prag të ndeshjes së Shqipërisë ndaj Islandës më 6 qershor ka thënë se kuqezinjtë kanë mundësi të artë për të fituar grupin.

Shqipëria nuk ka zhvilluar ende asnjë ndeshje në grup, pasi që ka pasur ndeshje me Rusinë (që është eliminuar nga UEFA-ja, për shkak të luftës në Ukrainë), ndërsa në përballjen tjetër të grupit, Izraeli e Islanda kanë barazuar 2-2.

Ndërsa në pyetjet e gazetarëve gjatë konferencës për shtyp, përgjigjet e Hysajt kanë qenë:

Gati për këto ndeshje? – Ne e kemi për detyrë të jemi gjithmonë gati kur na thërrasin në Kombëtare. Kam ardhur me shumë qejf. Me të vërtetë jemi në fund të sezonit, por kemi një mundësi shumë të mirë për të ecur përpara me Kombëtaren dhe duhet të tregojmë që po vazhdojmë të përmirësohemi ccdo ditë dhe më shumë. Unë jam 100% gati, ashtu sikurse edhe çunat.

Orari i ndeshjeve dhe Tabela aktuale

A kemi nxjerrë mësime për Islandën dhe Izraelin? – Po, u bënë disa kohë që nuk luajmë kundër, por siç kemi bërë në ndeshjen e fundit ndaj Islandës, kemi treguar që dimë të luajmë më mirë, dimë të jemi më të rrezikshëm. Dje pamë ndeshjen Izrael – Islandë dhe pamë një skuadër që po rrinte mbrapa dhe po luante në kundërsulm. Tani po përgatitemi për këtë ndeshje. Edhe në ndeshjen ndaj Spanjës që luajtëm ishim mirë, duke treguar që niveli ynë është duke u rritur cdo ditë e më shumë dhe besoj se të gjithë jemi gati për këtë ndeshje.

Vendi i parë në grup? – Jemi tre skuadra të forta, në një nivel të afërt. E shikojmë si një mundësi vërtetë sepse të gjithë e dimë që Rusia është një ekip me nivel të fortë dhe tani që mungon kemi më shumë mundësi për t’u renditur të parët dhe për të shkuar në play-off. E dimë që kemi një mundësi të artë që nuk duhet ta shpërdorojmë dhe ta shfrytëzojmë në mënyrat më të mira. E shohim si një dritare më shumë për të shkuar në play-off.

Kombëtarja shqiptare po bëhet gati për dy sfidat e Nations League, ndaj Islandës që do të zhvillohet më 6 qershor jashtë dhe më pas ndaj Izraelit më 10 qershor në shtëpi.