Inter-Napoli, çerekfinalja e dytë e Coppa Italia

Pas eliminimit të Fiorentinës e Romës, Napoli nuk lejon befasinë e radhës në Coppa Italia dhe kalon në çerekfinale.

Golat e El Kaddouri dhe Mertens në 15 minutat e parë dhe një gol i Callejon në minutën e 76’ mjaftuan që napolitanët të fitojnë pa probleme ndaj Veronës, e cila po kalon një sezon me shumë probleme.

Napoli dominoi gjatë gjithë ndeshjes dhe përveç tri golave humbi edhe një penallti në minutën e 72’. Në çerekfinale Napoli do të takohet me Interin e Mancinit, i cili mbrëmë mposhti Cagliarin me rezultat 3-0.

Vlen të përmendet që në këtë takim futbollisti shqiptar Elseid Hysaj nuk u aktivizua për asnjë minutë, përkundër paraqitjes së mirë që pati në fundjavën e shkuar në ndeshjen ndaj Romës.