Inter zë vendin e Napolit

​Fitorja e javës së kaluar ndaj Palermos, përkundër se e brishtë, i dha vetëbesim Interit të Andrea Stramaccionit të cilët sot me një paraqitje shumë të mirë kanë arritur të mposhtin Napolin në derbin e xhiros së gjashtëmbëdhjetë të Serie A-së, 2-1. 

Me golat e Freddy Guarin dhe Diego Milito, Inter arriti të krijojë epërsinë prej 2-0 në pjesën e parë, që i dha qetësi në pjesën e dytë.

Sulmuesi më i mirë i napolitanëve, uruguajani Edinson Cavani, ka arritur që të shënojë për të zbutur epërsinë e milanezëve në një gol në pjesën e dytë, mirëpo skuadra e Walter Mazzarit nuk kishte më fat për të shënuar edhe golin e barazimit që do t’i mbante në vend të dytë të klasifikimit.

Kosovari Valon Behrami, ka qenë si zakonisht i padiskutueshëm për Mazzarin, duke luajtur 90 minuta, derisa Blerim Xhemajli u fut në pjesën e dytë dhe prej kur ai hyri në lojë Napoli arriti të shënojë golin parë, që u përcaktua të jetë edhe i vetëm i Partonopei-ve në derbin e sontëm.

Inter tash ka 34 pikë dhe gjendet në vendin e dytë të tabelës me katër pikë më pak se lideri Juventus dhe një më shumë se kundërshtari i sotshëm, Napoli. 

REZULTATI:

Inter - Napoli 2-1 (Guarin 8, Milito 39 - Cavani 54)