Kampi U-15 përfundon me sukses

Kampi i pestë me radhë i organizuar nga Federata e Futbollit të Kosovës për grupmoshën U-15, sot ka përfunduar me ndeshjen finale të zhvilluar ndërmjet dy ekipeve të përbëra nga lojtarët më të mirë të këtij kampi.

Për ndeshjen finale, e cila u zhvillua në stadiumin e qytetit në Prishtinë, janë përzgjedhur 35 futbollistë më të mirë të kampit, të cilët u ndanë në dy ekipe, e që u quajtën sipas ngjyrave, ekipi i ‘Kaltër’ dhe ekipi i ‘Verdhë’, ndërsa fitores iu gëzuan ‘të kaltërit’, të cilët fituan me rezultat 2-0.

Në këtë kamp janë përfshirë gjithsej 144 futbollistë nga 7 rajone të Kosovës, të cilët për tre ditë sa zgjati kampi, kanë qenë nën mbikëqyrjen e kryetarit të shoqatës së trajnerëve, Ajet Shosholli, përzgjedhësit të përfaqësueses “A” të Kosovës, Albert Bunjaku, ndihmësve të tij, Muharrem Sahiti dhe Ahmet Beselica, si dhe trajnerëve të tjerë nga rajonet e ndryshme të Kosovës.

Në lidhje me përzgjedhjen e futbollistëve për ndeshjen finale, të cilët mendohet të jenë bërthama e përfaqësueses “A” për të ardhmen, foli edhe përzgjedhësi Bunjaku, duke sqaruar mënyrën e përzgjedhjes.

“Gjatë këtyre ditëve pamë cilësitë e këtyre të rinjve dhe qëllimi i gjithë kësaj pune është formimi i bërthamës së përfaqësueses “A”. Përzgjedhja e këtyre djemve është bërë në 4 faza. Së pari janë përzgjedh nga klubet, pastaj nga përzgjedhësi i rajoni, tash nga shtabi teknik dhe trajnerët nga 7 rajonet dhe kjo listë prej 36 futbollistëve do t’u dorëzohet përzgjedhësve të përfaqësueses U-15 dhe ata do të përzgjedhin 22 futbollistë që do të përbëjnë këtë përfaqësuese. Jam shumë i kënaqur me angazhimin dhe disiplinën e të gjithëve dhe mendoj se kjo traditë e kampeve duhet të vazhdohet dhe unë shpresoj se FFK-ja do të ndihmojë në përparimin e futbollit të të rinjve,” tha Bunjaku.

Vlen të ceket se në këtë vit jubilar të këtij kampi fanellat për futbollistët pjesëmarrës kanë qenë dhuratë nga futbollisti i mirënjohur kosovar, Emir Bajrami, i cili po luan për skuadrën greke, Panathinaikos.

Përbërja e ekipeve