LIRIA - LLAPI
Liria demolohet në Prizren
29 March, 2019 @15:58
Liria në përballjen që u zhvillua në Prizren ka pësuar 0-4 nga Llapi.
Duket se shpëtimi për Lirinë këtë stinor është i vështirë, për të mos thënë i pamundur.
Llapi me trajnerin e rikthyer Tahir Batatina ka shënuar fitore të thellë në Përparim Thaqi, duke fituar 0-4 ndaj Lirisë që nuk gjeti assesi golin sot dhe pësoi për të thelluar krizën.
Goli i parë i ndeshjes erdhi nga Ahmed Januzi (36’) pas asistimit të Mentor Zhdrellës, që bëri Llapi të mbyll pjesën e parë me avantazh.
Më pas, tentimet e Lirisë në fillim të pjesës së dytë nuk sollën rezultat dhe në 15 minutat e fundit ekipi i Erdogan Celinës pësoi edhe tre herë për të regjistruar humbjen e 14 të stinorit nga 24 ndeshje.
Ahmed Januzi shënoi përsëri (76’) pastaj Remzifaik Selmani (80’) dhe pas pak Selmani asistoi te Hamdi Namani (84’) për përfundimtaren 0-4.
Me tri pikët e reja të fituara, Llapi i është afruar liderit në 4 pikë, ndërsa Liria i “falenderohet” Dritës që ia shkaktoi humbjen Ferizajit, për të mos u larguar këta të fundit nga bardhezinjtë në klasifikim - për të mbajtur gjallë shpresat për shpëtim nga PlayOuti.
Në xhiron e radhës Liria do të ketë duel edhe më të vështirë, në Fadil Vokrri ndaj Prishtinës, derisa Llapi pritet të ketë punë të lehtë ndaj Ferizajit në Zahir Pajaziti.